Олимпиаданынъ макъсады – къырымтатар тилини, Къырым Джумхуриетининъ девлет тиллеринден бири оларакъ, фааль къулланувы ве популяризациясы; яшлар арасында къырымтатар тили, эдебияты ве медениети акъкъында ильмий бильгилерини арттырмакъ. Истидатлы яшларгъа къолтутув макъсадынен керекли шараитлерни яратув, яшларнынъ иджадий къабилиетлерини тайинлев ве инкишаф этмектир.

Олимпиада къырымтатар тилининъ тарихы акъкъында меракълы фактлар, къырымтатар тильшынаслыгъы саасында ильмий енъишлер акъкъында малюматларны бильмеге имкян ярата ве тасиль процессинде къырымтатар тилини даа да терен огренильмесине меракъ догъура.

Олимпиадада 200-ге якъын адам иштирак этти. Оларнынъ арасында студентлер-филологлар, дигер факультетлернинъ студентлери, университет хадимлери, колледж ве Къырымнынъ чешит кошелеринден кельген мектеп талебелери.

Олимпиада иштиракчилери номинациясына коре тест вазифелерини беджердилер, чешит саалардан ильмий, бедий метин парчаларыны терджиме эттилер ве диктант яздылар.

2022 сенеси апрель 28 куню Олимпиаданынъ тантаналы такъдирлев мерасими олып кечти. Гъалиплер ве оларны азырлагъан оджалар диплом, сертификат ве бахшышларнен такъдирлендилер.

Тешкилий комитет